A·doko ta·makku jakkalaniko champengna jotton ka·anio Cigarettes & Other Tobacco Products Act (COTPA) 2003 ni ning·o West Garo Hill a·ja hajalsana baten challan rangko ka·aha aro gong lakh 1.4 tangkarangko bilsi tong·saon dai ra·e man·angaha.
WGH a·ja ta·makku jakkalanirangko komiatna police dolrangni dilanichi niamgri palaniko, mande jinmao opaniko mongsongbate school aro mande tom·dakgipa biaprango ta·makku ringna on·gijani niamrangko ra·gatangaha. Garobadha PIC-ni ning·o 120 challan-rangko ka·aha aro gong 14,950 tangkarangko dai gamgipaoniko man·e skanggipao ong·aha. Dalu PS-o 86 challan-rang aro Hallidayganj PS-o 85 challan-rangko ka·angskaaha.
National Tobacco Control Programme (NTCP) campaign-rangko Health & Family Welfare Department, NHM Meghalaya ong·ate a·jani police dolrangna training-rangko on·aha aro Information Education & Communication (IEC) nigita jakkalani bosturangko on·e manderangna mikrakataniko on·angaha. Ta·makku ringanina sasti on·anisan ong·aigija ian chadamberangko aro ringgijagipa manderangko naljoke rakkina miksonge kamko ka·aniba ong·a ine WGH SP Abraham T. Sangma aganangaha.
Ta·makku jakkalanichi 50% nigita cancer sabisiko man·a altuani bidingo NTCP-ni State Nodal Officer Dr. Nabneeta D. mawrie aganangaha. Manderangko naljoke rakkina police dolrang an·tangtang kamko namen ka·enga ine Dr. Mawrie agandapangaha.
