South West Garo Hills a·jani sima ari jolrango niamgri napsrukbaaniko champengsoe nirokaniko dakchina Ampati South Western Zone, Garo Students’ Union (GSU) dol Deputy Commissioner Hema Nayak-o mol·molangaha.
Assam aro Bangladesh-oni niamgri napsrukbaani koborrangko adita niksona man·e dingtangmancha a·dok gegnini sima ari jolrango donggipa songrang jekai Mirjumla, Jhunjhuni, Aidoba, Garodoba, Garobadha tiniali, Assam aro Meghalaya-ni gisepo nangdimgipa ramarango salantian dondikate sandianiko dakna man·agita check gate-rangko donchinaba Deputy Commissioner-o janapangaha.
Meghalaya-ni sima ari jolrango dongenggipa nokrangoniko kakketgipa lekka pancharangko sandichinaba uamang janapataha. Jhunjhuni, Kathuli, Jholgaon, Thakurunbari, Mirjumla, Ichakuri, Chandamari, Aidoba, Chondonpara, Bansali aro Tepolpara songrango niamgri songdong a·chaanirangko dakgiparang batrikrikaniko nikna man·enganina ta·raken am·sandianirangko dakchinaba GSU dol DC-o mol·molangaha.
