Bobil dake chakatgipa gitcham dol Achik National Volunteer Council (ANVC) aro ANVC-B ma·mong aro a·dok sorkari baksa Agreed Text for Settlement (ATS) ni ning·o ku·chakgiminrangko da·onaba chu·sokatkujanina Union Home Minister Amit Shah-na seachi parakataha. Iani bidingo mijal salo gitcham dilgiparang jekai ANVC-B ni Chairman Bernard N. Marak aro Publicity Secretary Vicky Rose Sangma, unbaksana gipinrang tom·e chanchirimaha.
Tom·anio uamang ATS para 12.1-ko uamangni songgigrikani bidingo ja 6 prako Centre Level Monitoring Committee-ni nipilna nanganiko golporimaha. 2020 bilsionin ia nipilaniko daka dongkuja ine parakate mikkang chango Garo Hills-o ia tom·aniko ong·atchina uamang mol·molataha.
Home Minister-na see u·iatanio uamang committee-ko ta·rake tom·aniko ong·atchina, jatni daka rikako ripingna aro ja·pangoni dakchakaniko on·a mol·molataha. Unikoa, tangka paisarangko on·a baikamgipa cholko bikotchina aro songo noko nirok simsakgiparangko donchinaba u·iataha. GHADC-na bang·bate tangkarangko chamatchina ku·pattiataha, constitution-o adita dingtangatanirangko dakchina aro one-time financial support ba dakchakaniko songsalna dangdikgiparangna on·china uamang janapataha. ATS-ni ning·o ia ku·chakgiminrangko da·onaba dakujaenga ine gitcham bobil dolrang parakataha.
Unbaksana, ATS-ni dongimin sea jotao pangchake GHADC-na ta·rake tangkarangko watatchina mol·molangaha jeon gong 252.01 crore one-time bailout grant, forest development project gong 308.14 crore, songadamrango rika cho·ani aro ge·a gamani a·bako ra·dona gong 104.34 crore, chu·gimik gong 664.49 crore tangkarangko on·atchina uamang janapatjolaha.
Ma·mong sorkari ia tangkarangko ta·rake on·atahaode GHADC-o kam ka·giparangna dormaharangko on·a man·gen aro nangchongmotgipa project-rang ru·utgijaan tang·dogen ine dolgni Amit Shah na parakataha.
