Da·al salo opposition MDC-rang GHADC-o ong·enggipa obostani bidingo Governor baksa agan golpogrikchina West Garo Hills-ni Deputy Commissioner Vibhor Aggarwal-ko gronge janapangaha. Ia apsan obostani bidingo uamang batanggimin changoba Governor-ko grongangaha.
Skanggipao uamang Deputy Chairman-ni GHADC session-ko maming u·iata donggija bon·chongdikate nangchongmotgipa kattarangko chanchirimna on·janina Governor-na u·iataichina DC-ko didiataha. MDC-rang special session-ko on·taichinaba janapa dongaha.
Ja 43-na man·kujaenggipa dormaharangko on·china, gitcham bobil dol dake chakatgipa ANVC aro ANVC-B dolgnini a·dok aro ma·mong sorkari baksa songgigrike Agreed Text for Settlement (ATS) ni ning·o ku·rachakgiminrangko chu·sokate on·kujaenganina ta·rakale kam ka·atchina mongsongbate State Finance Commission-ko bosaie on·china aro tangkarangko ta·rake chamatchina mol·molataha.
Garo Customary Law bill-ko ra·chakchinaba uamang didiataha. Ia bill-ko ru·uta somoirangna skangan ra·chakmanaha jekon District Council Affairs Department-o ru·utatenga. Ia ra·chakgimin bill-ko somoigita matchotatchina aro chu·sokate on·chinaba uamang mol·molataha. Iarangni bidingo changni chang GHADC-ni Executive Committee aro a·dok sorkariko nirokatchina janapahaoba maming ja·kurangko ga·a dongkuja ine uamang janapataha.
Uamangni jrip donganiara manderangni aro council-ni neng·nikaniko batesa baridapatenga. Council-o ong·enga obostarangko Sixth Schedule-ni ning·o dongimin niamrango pangchake Governor niatna man·a aro daito ga·akani gimin GHADC-ni mamlako namatna ba olgrokatna man·gen ine MDC-rang janapataha.
Ia ong·enggipa obostarangko a·dok sorkari aro EC-ko chalaienggiparang niatjagenchimode jingjengataniko dakna uamang ja·ku ga·gen aro manderangni namgnina re·mikkanggen ine MDC-rang DC-ko gronganio janapangaha.
