Guwahati songjinmao da·al salsana ong·atanggipa Bidang Mixed Martial Arts (MMA) Tournament-o Garo Hills ni chadamberang niksengangaha. Ia susaanio adita dingtang dingtang biaprangoni manderang gisik nange bakko ra·na re·batokaha aro namen chu·sokgipa ong·e matchotaha.
Garo Hill-oniba skanggipa changna Turaoni A·chik Warriors Mixed Martial Arts bakko ra·angaha. Uamango chu·gimik saksni MMA-na gisiko nanggiparang Guwahati songjinmaona re·ange an·tangtangni bilak wa·saaniko aro changa sapaniko mesoke ka·kimchaen gipinrang baksa susagrikangaha.
Ian Garo Hills-na a·bachengenggipa aro dingtang dakgipa sports-ni a·bao ga·tape gipinrang baksa susagrikani ong·genchimoba Tura A·chik Warriors MMA dolna namen katchabegipa ong·aha. Maina, uamangoni ia susaanio bakko ra·gipa saksnioni Gold medal ge·gni aro Silver medal ge·sako cheenba Garo Hills-na aro jatna mikkim rasongko ra·baaha.
Salsana ong·atgipa Bidang Mixed Martial Arts susanio A·chik Warriors Mixed Martial Arts, Tura-ni Pangsrang M. Sangma aro Akiba A. Marak Kickboxing-o Gold-ko man·angaha aro Agasa Ch. Momin Silver medal-ko cheangskaaha. West Garo Hills Wrestling Association-ni President Johnsonbon G. Momin ia somoio jatna mikkim rasongko ra·baanina kusiniko parakan baksa ia susagrikaniona re·ange bakko ra·na tangka paisanigita aro pilak nanganirangna dakchakatgipa a·dokni Chief Minister Conrad K. Sangma aro North Tura ni MLA Thomas A. Sangma ko mittelangaha.
