Da·al salni bako Cariz, Wadanang, Tura o Mangsang Ampang Mahari Association (MAMA) Tura Unit, 2 gipa changna A·chik nokdangko rikani bidingo niam bidik ko skie on·ani tom·bimonganiko ong·atangaha.
Tom·aniona Meghalaya Legislative Assembly ni Speaker Thomas A. Sangma mongsonggipa sokgipa ong·e bakko ra·angaha. Apsan dake tom·anio skie ku·pattianirangko on·a gita Pa Tangrang M. Sangma aro Pa Dillip M. Sangma ba sokbae bakko ra·angpaaha.
Ia tom·bimonganiko ong·atanina kusi ong·aniko mesoke aganengon, ‘A·chikrangni daka rikanirangko skie ku·pattiange on·a gita indaka tom·anirangko ong·ataniko namen gamchatatachisa jatni daka rika, niam reti, daito aro bewalrangko ripingna gita man·gen aro an·ching jatni indaka niam bewal rangko ripingjaode jatna gimagni ong·na ama’ ine Thomas A. Sangma aganangaha. Iako dakdilengon jatni daka rikanirangko ripingan baksana da·o dalrobaenggiparangnaba jatni daka rikani bidingo agan skiroroe on·a nanga ine Sangma agandapangaha. Una agreba jatni niam reti kosan ong·aigija ganding chinding, aro cha·a ringanirangkoba ripingna gita kamrangko ka·na cholrangko ra·na nanga ine ua didiangaha.
Ia tom·bimongani bako Pa Tangrang M. Sangma aro Pa Dillip M. Sangma A·chik nokdangko rikani bidingo niam bidik ko skie on·an baksana, nokchame gaani, chawari sing·ani, sia-janggi galo dakna nangani, Chra aro maharini kam, daito-niamrang aro adita gipin daka rikani giminba agantalatanirangkoba dakangaha.
