North Garo Hills a·jani 23 Bolsong Constituency-o mijal sal August 8 tarik Nationalist Congress Party (NCP) skanggipa changna tom·aniko ong·atangaha.Ia tom·aniona NCP State President Omilo K Sangma aro Women’s Wing-ni President Serimina Marak mongsonggipa sokgiparang ong·e NCP Party ko Garo Hills a·jarangona ra·bapile tangchaataina ine talataniko dakangaha.
NCP ko Garo Hills ona ra·bapilani miksonganian Corruption ba tangka jakkalsretanirangko bon·atna aro Garo Hills Autonomous District Council (GHADC)-o ong·enggipa obostarangko namdapatna ong·a ine janapangaha. Uni gimin a·dok chigako silroro namroroate jatni gamjinko ripingenggipa District Council-ko namatpilna gitade da·o dongenggipa party rangko galenba gitalko seokna ku·mongna nanggen ine NCP State President Omilo K Sangma aganangaha.
Ia tom·anio NCP Party ticket ko da.o ong·nasienggipa 2026 bilsio North Garo Hills-ni damgni Constituency rang jean 39-Rongrong aro 23-Bolsongni candidate rangna ticket on·anikoba parakangaha. 39-Rongrong Constituency-o bilsi 25 ong·gipa Sengmatchi M Sangma, aro 23-Bolsong Constituency-o Dringbirth M Sangma na Party ticket-ko on·ange GHADC election-o susaaniko dakanggen ine State President parakataha.
Tom·anio State President, 23-Bolsong Constituency-o Dringbirth Sangma na na·simang bakrimaniko nikani gimin Meghalaya NCP Party ticket ko una on·angenga ine aganange mikkangchiba ku·mongrikaniko dakangkuchina manderangko didiangaha. NCP Party-na vote ko on·anichi songsul noksulni gita ku·mong nangrimesa District Council ko namatpilna man·aigenok ine State President janapangaha.
A.chik a·songna aro Aman A·songna ka·sae an·tangtangko jatna dangdike on·e jatni dakbewal rikbewal aro gamjinko ripingenggipa District councilko namatpilna gisiko saoba skani donga ong·ode Garo Hills-ni je Constituency-niba NCP party ticket chi susana gita dorgasto rangko on·pachina Me·chik dolni dilgipa Serimina Marak parakataha.
