Garo Hills Autonomous District Council (GHADC)-ni dormaharangko on·a man·gijani bidingo Chief Minister ni batanggimin EC rangko matnangjringe a·dok sorkarini daito ra·na nanganiko jechake tangka gong 120 crore ko chamate on·aniko janape dakchakaniko on·enga ine agananiara lekka rango see rakkigipa baksa dingtangrika ine Meghalaya Pradesh Youth Congress President Timjim K. Momin matnangataha.
GHADC-o kam ka·giparang indita bilsina bang·a neng·nikanirangko chagrongangaha jekai bi·sarangna skul fee rangko gamna, sanna bannaniko dakna aro noksul songsul rangniko tangka ra·sroesa uamang janggi tangangenga. Ia obostani bidingo pangnan sing·doanirangko dakon, sorkarinigita maming ja·ku de·aniko nikrongja ine Momin janapangaha.
GHADC ni session-o Finance ni kamko jako ra·enggipa EM ni agananigitade, 2015 bilsio crore 15.2 jean ja 4 ni doramaharangko on·a man·gija donangaha. 2021 bilsio crore 126 jean ja 32 ni dormaharangko on·a man·jaha aro 2022 bilsio ja 26 manchani dormaha jean crore 102 rangko on·a man·gija donangskaaha. Ian opposition dolrangni matnange agananisan ong·aija maina sorkarini see rakkigipaon segatgimin donga ineba Momin aganangaha.
2015 bilsio dormaha on·a man·gijaniara ja 4 san ong·genchimode maikai ja 32 ona kingking tang·doataha aro sawa mancha ia obostakora dal·dapatangaha ine Momin, Chief Minister ko sing·doangaha. Unbaksana a·dok sorkarini council na crore 120 ko chamatgenchimode maina mancha tangkarangko jakkalangaha aro maikai dormaharangko on·a man·angjaha ineba sing·dapangaha.
Indita somoina council ko namdapatna kam ka·genchimode maikai obostarang namjaroroangaha aro batanggimin somoio niamni a·palo kamna rakkigipani a·selko dos galaniara ong·chongmotja maina dormaha man·gija nokdangrangna maming dakchakaniko ra·bajawa ine Momin aganangaha. Je sorkarini naba dakgualanirangko namdapatna bilsi 7 ni somoiara name manchaan chu·onga aro saksa dilgipani kam ara kam ka·giparangko nirokani aro uamangni dormaharangko somoigita on·ani ong·a.
Batanggimin sal somoirango ong·gipa obostarangko jaksi otaigija da·oni somoio pangchake namdapatna nanganirangko da·o sorkariko chalaienggipa ja·ku de·e kam ka·na nanga ine Timjim Momin Chief Minister ko didiangaha.
