Chokpot CHC-ni bidingo manderangni adita agan janapanirangko knasona man·e dolgni NGO dolrang chong·motan Garo Students’ Union (GSU) aro Chokpot Area Vigilance Committee biapona re·ange nirokeaniko dakangaha. Uamangni re·ange nirokeon CHC-o doctor saksa mangmangsan dongaia ine u·ina man·angaha. Ia CHC-ona sokbagipa gipin doctor-rang bachitokaha aro jolni manderang gimikko sanna banna saksa doctor mangmang chu·onggenma ine NGO dolrang sing·doangaha.
Unbaksana, me·asarangko sanna donchakram biapo pangka kam ka·gijaniko, bijoli wata tik ong·gijaniko aro paikanarangni setagijaniko nikna man·aha jean manderangna jakkaltogojagipa ong·a ine u·iataha. Hospital-ni chu·gimik rongtal an·talani aro name nirok simsakanirang dongjaengani gimin daito donggipa officer-rangko nirokatchina NGO dol didiangaha.
Indakgipa obostarang ong·engani a·selo sanna bannaniko dakna sepang ba chel·a biaprangoni re·bae sangiparangna namen neng·nikaniko on·enga. Nirok simsakgija galchipaniara ra·chakna man·gijani aro nangchongmotgipa sanna bannaniko on·a chu·onggijani ong·a ine uamang agandapangaha.
Ia pilak neng·nikanirangko olgrokatna CHC-ko name nirok simsakchina, doctor-rangko aro kam ka·giparangko chu·ongagita rakkichina, jakkalna nanggipa bosturangko tarie on·an baksana rongtal an·tale rakkichina daito donggiparangko NGO dolgnian mol·molangaha.
