Robibar salo Ganol chibima Sella Warioni ta·rakbegipa chi man·pakangani a·sel gimagipa South West Garo Hills a·jani Sub-Divisional Agriculture Officer Teseng M Sangma-ni manggisiko da·al salo man·aha. Marak-ko sandia da·al salko ra·e salbri mang gapaha. Robibar salo attampang 4 bajimangoni sandina jotton ka·ahaoba andalbeani a·selo dontongna nangao ga·akaha aro Sombar pringoni sanditaianiko dake da·o brigipa sal ong·pilosa salpaksa batao Sangma-ni sogimin bimangko man·aha.
Nikgipa manderangni agananigitade sianggipa Agriculture Officer-ko Robibar attampango uni nokni manderang baksa somoiko re·atengmitingo uko ta·rakbegipa chi man·pakangaha ine parakaha.
Koborko man·a bakan State Disaster Response Force (SDRF), Special Rescue Team (SRT), Fire and Emergency Services (F&ES), police dol aro songni nokni chi ripna changgiparangba sandiaha. Chirang kimongkue aro dal·kuani gimin aro mikkarang wakuengani a·selo dam-oni chiko watna nangao ga·ake Sangma-ko Sombar aro Mongol salo sandibeoba man·jaha. Mijal wal aro da·al salo adita mikkarang waa komiangnichi sandigipa dolrang pringoni dontonggija sanditaienba officer-ni bimangko Banseng Wari jolniko man·eaha.
