Garo Hills Autonomous District Council (GHADC)-ni Non Gazetted Employees Association (NGEA) dolrang William point-o sit in demonstration ba asonge jingjengatani ka·anirang chu·gimik sal 19 gapaha. Uamang ia jingjengataniko July 7 tarikoni a·bachengataha jeon bilsi 4 ong·nasipile dormaharangko man·kujaenganina dormahako on·chinagita jingjengatenga.
Ia jingjengataniko NGEA-ni President dakdilenga jeon council-o kam ka·giparangko July 29 tarikoni office re·aniko dontongataona sokataha. Uamang baksa warachakgipa dolni sak 3 MDC-rang chong·motan Cherak Momin, Pardinand Shira aro Alphonsus Marak jingjengategiparangna chakpaaniko mesokna bakko ra·angenga.
Adita salrangna skang August 1 tariko Meghalaya Governor baksa iani bidingo chanchirimanio Governor-ni name aganchakaniko man·aha ine Kharkutta-ni MDC Cherak Momin aganaha. Unbaksana ia obostako ta·raken nirokatchina Governor a·dok sorkariko aro GHADC-ni office ko kulitaipile kam ka·na aganchina Momin-ko didiangaha.
Ia somoio GHADC tangka paisanigita namen neng·nikaniko chagrongenga jeon ru·uta somoirangna 5th pay commission-ni dormaha aro arrear-rangko on·agita gong 252 crore tangkarangko nangenga. Indake ong·engon ia antini gisepo uamangni dabianirangko chu·sokatjaode MDC-rang office biapo jingjengatanio bakko ra·anggen ine Momin raken agandapangaha.
