Meghalaya ni gitcham Governor Satyapal Malik batanggimin somoirangonin ka·rongteni sabisiko man·e Delhi songjinmani Ram Manohar Lohia Hospital-o sanna baaniko dakanggenchimoba be·en ni bilgriroroaniko man·e bilsi 79-o a·gilsakko wate re·angaha.
Satyapal Malik uni politics ni a·bao skanggipa changna Uttar Pradesh a·dokni Baghpat-o Bharatiya Kranti Dal party oni MLA ko 1974 bilsio seokako man·angaha. Ua Rajya Sabha ni MP aro Aligarh constituency-o Janata Dal partynigita Lok Sabha ni MP ba ong·angaha.
2017 bilsio Malik ko Bihar ni Governor na seokange Odisha a·dokkoba nirokna daitoko on·angaha. August 2018 o Jammu and Kashmir ni Governor na uko seokangskaaha jeni somoion Jammu and Kashmir ko damgni Union Territory ona bak dake 2019 bilsio ma·mong sorkari bimang ong·atangaha. Uni ja·mano bon·kame Malik Goa aro Meghalaya a·dokrangni Governor ong·e kamko ka·angskaaha.
