Trinamool Congress (TMC) party-ni Meghalaya a·doko mikkangchi re·mikkangani cholrang komianganiko niksamsoe a·dokni gitcham Chief Minister Dr. Mukul Sangma kattarangko pindape parakangaha.
TMC party Meghalaya a·dokona batanggimin 2021 bilsio Dr. Mukul Sangma aro Charles Pyngrope-ni dilanio sak 12 MLA-rangko rimnapna man·e ja·dil suanggenchimoba mikkangchi a·doko party-ko dal·dapatanirang namen apchangket ong·angenga.
Da·o dipet Meghalaya a·doko TMC-ko bilakdapatna maming chanchianirang dongkuja ine warachakgipa dolni Mukul Sangma parakaha. Iako aganengon, TMC party-ko dal·dapatna maming cholrangko ra·jani gimin mikkangchi ua manderangni chanchianirangko nirokesa re·mikanganggen ine Sangma aganangaha.
A·doko rikgimin party-ko tangchaatpilna bimchipe kam ka·na miksongani dongjaenga . Political-ko dingtangatnade manderangni gisik nanganiosa pangchaka ine warachakgipa dolni dilgipa Mukul Sangma aganangaha. Meghalaya a·doko TMC party election-na susaanio ge·sangipa party ong·e kam karimskarang baksa bakko ra·angaha. Indake politics-nigita tanggitik bilake dakchakanichi aro manderangni baseani ba vote-rangko chimonganio dakchakaniko pangchakja ine Mukul Sangma aganangaha.
Mikkangchi dingtang party-rang baksa bakrimna chanchianiko aro TMC party baksan bakko ra·angna miksongkuenganiko sing·on je ja·kuko ga·oba manderangni namnikao aro a·dokni nanganirango pangchakgen ine Sangma aganangaha.
