Captain Williamson Sangma State University-o poraina am·enggipa bang·a chatro chatrirang dingtang dingtang course rangna admission ka·angenga aro ta·raken class koba kuliatna miksonganiko Education Minister Rakkam Sangma u·iatangaha. University ni damgni campus jean Tura aro Shillong-o bang·a chatro chatrirangni admission ka·anichi class rangko a·bachengatna tarisamsoanirangko ka·manaha ineba Sangma parakataha.
Batanggimin bilsirango je college rangan North Eastern Hill University (NEHU) baksa bakrimgijagiparang ia changoni State University ni ning·o napataniko man·genok ine Sangma talataniko on·angaha. Ian people’s college aro grant-in-aid college rangba State University ni ning·o ong·genok ineba parakataha.
Gipin government college rang jean NEHU ni ning·o ong·gengkuenggiparang mikkang bilsi dipet State University baksa bakrime kamrangko ka·angskagen ine Sangma aganangskaha.
Shillong campus-o ia bilsina English, Commerce, Khasi aro Social Work Department-rangna admission-ko a·bachengataha jekon Shillong Government Engineering College campus-o class rangko ka·angchenggen maina Bijni Complex-o class rangko ka·chakna da·o dipet Court-ni niam gita maming raiko on·kujaenga ine Minister janapangaha.
