West Garo Hills Selsella-ni ning·o ong·gipa Mandagre aro Nokatgre songrango gitalgipa Village Organisation (VO) Office-ko a·bachengate on·angaha jean ning·tugipa songrango songe on·aniara mikkangchi songadamrango chu·sokaniko mesokani ong·a.
Ia office-rangko MGNREGA scheme-ni ning·o Village Employment Council (VEC)-rangni rakbee jotton ka·anichi chu·sokna man·aha ine koborna parakataha.Ia program-o Selsella-ni MLA Arbinstone Marak mongsonggipa sokgipa ong·e oprakangaha. Unbaksana Selsella C&RD Block-ni BDO Emanuel M. Sangma, WGH MSRLS-ni DPM Mechele Momin aro Selsella-ni MSRLS-ni BPM Jenny Freshta Marak dongpae bakko ra·angaha.
Ia gitalgipa Office-ko a·bachengate on·anio songsalna dangdike on·a aro mikkangchi sorkarini dingtang dingtang scheme-rangko namgipa cholko ra·e ka·angchina Arbinstone aganangaha. Apsan daken Chief Minister-ni Billion Dollar Economy-ko chu·sokatna miksongenggipa baksana bakrime songsalni namgnina kamko ka·china didiangaha. Unbaksana chadamberang aro SHG-rangko CM Elevate-rangko chol ra·e ja·kurangko de·chinaba didiangjolaha. Una agreba NH-127B ni namanggijanirangko nike nambate tarina a·arangko on·china jolni bako donggiparangkoba janapangaha.
Ia VO-ni nokrangko namdapatna aro dakchaknagita BAKDIL NGO-ni chalaienggipa Selsella Block Mission Management Unit (BMMU) baksana MSRLS-ni mongsonggipa kam ong·a.
