Tura songjinmaoni adita chel·ao donggipa Sella Wario Ganol chibimako batsotna jotton ka·anio South West Garo Hills a·jani Agriculture Officer saksako chi man·pakangaha. Ia obosta da·al salni bako ong·aha aro chio gimagipa Agri Officer Teseng M. Sangma-ko da·onaba man·kujaenga ine u·ina man·aha.
Police dolrang attampang 3 bajimang batao a·damona sokange Fire & Emergency Services, SDRF aro songni chi napna sapgiparang baksa Sangma-ko sandina a·bachengaha. Sangma-ko da·al attamni bako sandibeahaoba man·jaha aro waltingahani gimin attam 7:30 mang bajio dontonge knal pring sengnang am·sandianiko daktaiskana tik ka·aniko WGH Superintendent of Police Abraham Sangma parakangaha.
Tura aro wilwila jolo ia antigimik adita mikkarang ga·akaha jean mijal walona kingking jimbee da·al pringni bakonan aditana wa·angaha. Unbaksana, Ganol chibimao dam dongani gimin salantian chirangko watna nangao ga·akenga mongsongbate mikka jimbee chirang skongani somoirango. Iasan ong·aigija Ganol-o chimonggipa chiringrangba mikka jimbee waode chisringrangko ditdoata aro namen kimongata.
Da·o dipet chiko watani somoio siren ba manderangko simsake dongsonagita maming u·iatanirangko daka dongkuja. Mikka jimbemitingo dolong ongiparangko jakkalgipa songni manderangnaba namen neng·begnigipa aro kenbegnigipa ong·a. Mikkangchi apsandakgipa a·sel ong·aoniko champengsona man·agita chisam jolo gam·atgipa kolko dona nanga. Iako dakanichi adita a·sel ong·anirangkoba naljoksona dakchaknaba gnang.
