TMC dilgipa Dr. Mukul Sangma, GHADC-ni MDC-rang baksa council-o man·a nangkuenggipa dormaharangni bidingo golporimna a·dokni Governor Chandrashekhar H Vijayashankar-ko grongdilangaha. Council-o ong·enga obostarangko a·dok sorkarini niatna gisik nanggijaniko MDC-rang Governor-na talataha aro uko nirokatchina mol·molatangaha.
Re·anggipa somoirango tangka paisana neng·nikanirang dongahaoba da·o ong·enga obostarangko niate ia chang namjabataha jeon ja 43 mangna dormaharangko man·kujaenga ine Dr. Mukul Sangma aganangaha. Dormahani bidingo kam ka·giparang July 7 tarikoni jingjengatna a·bachengaha aro uamangna chakpaaniko on·a TMC dolni MDC-rangba bakrimpanaba gnang ine Sangma parakangaha.
TMC-ni MDC-rang re·anggipa GHADC session-o maming u·iata donggija session-ko dontongatani gimin special session-ko on·taichina mol·molaniko janape memorandum-ko on·angjolaha. Ranggitik dontongatanichi nanggipa sing·anirangko dakna man·jaenga aro ian democracy-ni on·gimin bilko champengani ong·a ine MDC rang parakangaha. Opposition dolni MDC-rangni agananigitade nanggipa katta bichongrangko golponagita sorkari nokgipanasan bilko pakwataha jean dolgipinrangni ku·rangko ku·tipatani ong·a ine aganangaha.
Minggipin, TMC dolni MDC-rang Agreed Text for Settlement Clause 7.7 ko chong·motan 2014 bilsio ma·mong sorkari, a·dok sorkari aro bobil dake chakatgipa dolgnini gisepo soi ka·gipako da·onaba ra·gatkujaengani gimin janapataha. Ia clause-nigita Meghalaya State Finance Commission daito donge nirokna nanggenchimoba da·ona kingking bilsi 10 batahaoba a·dok sorkari maming daka dongkuja ine uamang aganangkuaha.
Unikoa, MDC-rang Garo Customary Law Bill-ko matchotatna a·dok sorkariko ka·dilchina Governor-ko mol·molangaha.
