Chhatisgarh a·doko ong·gija kamna matnanganiko man·e rim·a man·gipa Kerala-oni Catholic ma·malni sakgni Sister-rang da·al salo Durg Central pattokoni bail man·e ong·kataha. Sister Preethy Mary aro Sister Vandana Francis sakgniko batanggimin somoio mande badinggipa aro drae toromo napatgipa ine matnangenba pattoko donataha.
Court ia obostani bidingo name sing·sandianiko dakenba aro che·eme ma·siani ja·mano Sister sakgnini kosako matnanganirangko tol·e chanchichipgipa aro sakki grigipa ine parakataha. Obostao ga·akgipa mandeni ma·apaba Sister sakgnini kosako matnanganirangko jegalangaha aro toromo napatna maming draani dongja ine sakkiko on·e talatangaha.
Chief Minister Conrad Sangma, Sister sakgniko rim·ani bidingo da·al salo Chhatisgarh-ni Chief Minister Vishnu Deo Sai-na chittiko seate nirokatpachina mol·molataha. Sister sakgnini kosako matnanganirangna maming pangkamgipa sakkirang dongjani gimin uamang bail-ko man·e jail-oni da·alo ong·katna man·aha. Uamangko Catholic ma·malo bebe ra·giparang, dilgiparang aro chakpagiparang rimchaksoaniko dakangaha.
