A·dokni District Council rangko uamangni tangka paisa jakkalanirangko komiatchina aro kajina man·ani ba dingtang dingtang cholrangchi tangka paisa man·anirangko an·tangtangon pangchakna nanganiko Deputy Chief Minister Prestone Tynsong ku·pattianiko on·angaha. Ian Garo Hills Autonomous District Council (GHADC) aro Jaintia Hills Autonomous District Council (JHADC) rango kam ka·giparangna dormaharangko on·a man·gijani gisepo Tynsong janapangaha.
Kam ka·giparang ja 2 ba ja 3 na dormaha man·jaon neng·nikani ong·genchimode indita bilsirangna tangka man·gija maikai janggi tangna man·gen ine Tynsong sing·doangaha. Iako aganengon, ADC rang dingtang mancha an·tangtango tangka paisa donggiparangko name dake jakkale ja·ku de·angna nanga maina ia ong·enggipa obostani dal·aniko u·iesa kamkoba ka·na nanga ine janapangaha.
Mikkangchi District Council rang nangana batpile tangka jakkalgenchimode rongdik-o donggipa je kajinaba baikamna man·jawa aro indake nanggijagipa koros rangna tangka jakkalaniko dontongchinaba Tynsong ge·etangaha.
Batanggimin somoirango obostani kri council rangna kajina man·a nanganirangko a·dok sorkari somoi ong·na skangan on·ate dakchakanggenchimoba, indakgipa ja·ku de·aniara jingjrotna baikamgipa ong·na man·jawa ine ua aganangaha. A·dok sorkari apsan chanchirime maidakgipa cholrangko ra·bana man·aniko nianggen indiomangba ia tangka paisani obostaoni naljoknade council rangni daitoan aro uamangni chu·gimik jakon ong·aia ineba Tynsong parakataha.
Khasi Hills Autonomous District Council (KHADC) na agrede indake ja 6, ja 7, ja 8 rangna dormaha man·gijaniara gitalgipa ong·ja maina ia obosta ong·anirangko indita bilsirangna nikna man·angaha.
