Da·al salni bako West Garo Hills a·jani Government Boy’s Higher Secondary School Tura-ni Football Turf-o 5-gipa aro 3-gipa Me·a Me·chik dolrangni Inter Mahari Football kal·susaaniko PHE Minister aro Williamnagar-ni MLA Marcuise N Marak oprake on·angaha.
Ia oprake on·aniona IAS Vaibhav Sharma, NPYF-ni Working President Dabo Marak, Chokpot-ni MLA Sengchim N Sangma, Additional Deputy Commissioner Dolrich B G Momin, District Sports Officer Saljagring Marak aro District Football Association dolni manderangba re·bae bakko ra·angaha.
Meghalaya a·doko dingtangmancha 2018 bilsini ja·mano kal·susaani a·bao rika cho·aniko dake chadamberangna nambata gadangko a·dok sorkari on·enga aro iarangan a·dokni dingtang dingtang bakrango artificial turf-rangko tarie on·anichi ong·enga ine Marcuise Marak aganangaha. Indakgipa namgipa cholrangko chadamberangna on·engon chadamberang iarangko gisik nange jakkalna nanga aro kal·susaani a·bao chu·sokna jotton ka·na nanga. Indake a·dokna dingtang dingtang kragipa ba dal·gipa gadango chegipa ong·e Gold, Silver aro Bronze medal-rangko ra·bagenchimode a·dok sorkarini gita chadamberangni lekka poraia gadangni kri kamrangko nigrike on·gen ineba Marak agandapangaha.
Chang 5-gipa aro 3-gipa Me·a Me·chik dolrangni Inter Mahari Football Tournament-o Me·asarangoni dol 37 aro Me·chikrangoni dol 20 bakrangko ra·angenga. Me·asarangni skanggipa kal·susaanio Dawa mahari-rang Rongmuthu mahari baksa kal·susaangaha. Rongmuthu maharini Gobang A Sangma, Gino A Sangma, Enibirth R Sangma aro Itnasius R Sangma doltangna goal prakko chipe on·angaha. Dawa mahari-oni Winar D Sangma-san goal sa-ko chipe on·a man·angaiaha. Indake ia skanggipa kal·susaanio Rongmuthu maharirang 5-1 goal-rangko chipna man·e chegipa ong·angaha.
Da·al salo kal·susaanirangko a·bachengatange bon·kamgipa kal·susaaniko re·baenggipa September 20 tariko P A Sangma Stadium o kal·atanggen. Inter Mahari Football Tournament-ni bon·kamgipa kal·susaanio mingsingbegipa Bollywood Actor John Abraham-ko Guest of Honour-dake niksona ka·dongsoenga ine West Garo Hills-ni DSO Saljagring M Marak, Ku·rongdik kobor ra·timgiparangna parakatangaha.
