WGH Tura Christian Hospital-o da·al salni bako World Breastfeeding Week 2025-ko gisik ra·e program-ko ong·atangaha. Ia programko “Invest in Breastfeeding, Invest in Future” katta bichongo pangchake ong·ataha jeon an·seng baljokame dongna, koros komiatna aro sok kanani namgnirangni bidingo mikrakataniko on·a miksonge ong·ataha. Deko alduenggipa magiparangna sanchakgiparangniko aro songsalnigita dakchakna nanganirangkoba agantalatangaha.
Ia programme-o TCH-ni Medical Superintendent Dr. Editha W. Momin rimchaksoani kattarangko aganaha aro ia Breastfeeding Week-ko District Maternal & Child Health Officer Dr. Ivonne M. Sangma a·bachengate on·angskaaha.
DMHO Dr. Ivonne M. Sangma, bi·sa atchia kontasani gisepon ma·gipa bi·sana sok kanna nangani aro jadok mangna sok kanne bilsi gniona kingking sok kannani gamchatani bidingo aganangaha. Unbaksana an·o dongmitingoni agan kupattianirangko on·an baksana bi·sa an·pakani ja·manba simsake ma·giparangko bilakroroatna nangani bidingoba Sangma talatangaha.
Ia programme-o bakko ra·giparangna simsakaniko aro sok kanne adita sabisirang jekai diarrhoea, pneumonia, diabetes, bi·sarangni agre milaniko champengna man·ani bidingo Gynecologist Dr. Dila K. Sangma talataha. Una agreba ma·gipani be·en an·senganina, bi·sa ba·aniko ong·telaigipa cholrangchi champengani aro an·pakani ja·mano neng·nikanirangona sokatjanagitaba talataha.
Sok kannani namgnirangko u·iani ja·manba songsalo dakbewal rikbewalrangko ja·rikani a·selo ma·gipani sok kannani komiani, kam ka·chakram biap donggijanichi aro a·bachengaonin bottle-rangchi kannani a·selo ong·aha ine u·i ma·sigiparang aganangaha. Iarangni gimin hospital-rango ba kam ka·chakramo sok kanna biaprangko on·a man·agita dangdike on·giparangko simsakchinaba aganaha.
Ia programko TCH-ni Deputy Nursing Superintendent Namchao Marak mittelpilani kattarangko aganan baksana sanna bannanio dakchakgiparangko demittelpilangaha.
