Da·al salni bako bilsi 30 aro uni kosako ong·gipa manderangna, Tura Civil hospital-o Cancer Screening Programme-ko ong·atangaha. Ia programme-ko WGH a·jani NCD Clinic, Tura Civil Hospital baksana District Health Society bakrime ong·ataha. Ia screening camp-ko pring 9 bajioni 2 bajiona ong·ataha jeon Tura aro sepangjolo songdongenggipa manderang bang·en bakko ra·angaha.
Ia program-ko ong·atani miksonganiara, cancer sabisi a·bachengbaako ba sabisi man·asianiko maikai ma·sisamsoe somoigita aro nambate sanna bannaniko dakna man·agita ong·ataha. Bilsi 30 aro una batgipa manderangko dingtangmancha nianiara, ia dongimin bilsini manderango cancer sabisiko man·gipa bang·rongbatani gimin uamangko mangsonge niani ong·a. Sabisiko a·bachengoni u·ianiara name sanna bannaniko daksoe namatpile chu·sokna man·a ine Tura Civil Hospital-ni Senior Specialist, Radiation Ontologist, Dr. Jeby Marak aganaha.
Ia screening-ko ka·aniara dingtang dingtang cancer sabisini chinrangko ma·sina jekai soko tom·ani, satipo tom·ani, ku·siko ulcer ba lesion ong·ani aro okrango ripomani ba u·ina man·gija skatang tom·anirangko ma·sinagita ka·ani ong·a. Indake sabisi a·bachenganiko ma·sinagita medical dolrang adita clinical tests aro porikka ra·anirangko dakangaha. Ia porikka ra·anirangara general clinical examination, oral screening, clinical breast examination, sonography (ultrasound), VIA (Visual Inspection with Acetic Acid) for cervical screening aro nambate ma·sinagita an·chirangkoba porikka ra·angaha.
Ia program-o NCD clinic-ni medical personnel-rang, doctor-rang, nurse-rang aro dangdike on·giparang porikka ra·anirangko dakan baksana bakko ra·enggiparangna an·seng baljoke dongani bidingoba agantalatangaha. Unbaksana cancer sabisiko komiatnagita sabisi a·bachengbamitingon ma·sisamsoe sannaniko dakanian nambatgipa chol ong·a ine bakko ra·giparangna talatangaha.
Una agreba ia batrikrikgijagipa cancer sabisiko dakgrikna pangnan porikka ra·anirangko dakna aro indake tangka nanggija porikka ra·anirangko ong·atanio bakko ra·na cholko ra·china Officialrang didiangaha.
