North garo Hills Rajasimla jolo July 18 tarikoni gimaenggipa bilsi 6 ong·gipa me·chik bi·sa saksako da·ona kingkingba man·kujaenganina tom·tome re·jomaniko dakangaha. Ia tom·aniko Kharkutta kal·chakram bakrao dingtang dingtang NGO dolrang jekai GSU, RYO, RYC aro RCDC dolrang ong·ataha jeon mikka wagenchimoba jolni ma·aparang, chatro chatrirang, songni nokni dilgiparang aro chadamberangba chakchikijan bakko ra·angaha.
Ia me·chik bi·sako rim·srukanio jak donga ine potchipgipa Sonjith Arengh-ko re·anggipa July 24 tariko NGH police dol rim·aha. Indake ong·genchimoba da·ona kingkingba ia me·chik bi·sako man·kujaenga. Batanggimin salrango NGH Kharkutta police baksa gimagipa bi·sako sandina Shillong-oni K9 unit CID dolrangba sokbaaha. Songni manderang aro Search & Rescue Team (SRT) dolrang drone-rangko jakkale sandibeoba man·jaha.
Uni gimin sorkariko chang·satai didiatan baksa sanditaianiko dake gimaenggipa bi·sako man·e on·china aro nokona rimbapilchina ia re·jomaniko dakangaha. Ia bilsi dok ong·gipa bi·sani bidingo da·onaba maming koborrangko bano aro maidake dongenga darangba u·ikuja. Unikoa police dolrangba aro sorkariba uko sandianiko dontongaha.
Donkamme D. Sangma-ko sandianiko daktaichina uamang dabiangan baksa uko man·kuja dipet tom·tom dongjawa ine dilgiparang aganangaha.
