Mijal salo Congress dolni saksa kamkam dongrikgipa Mylliem-ni MLA Ronnie V. Lyngdoh-ni party-oni ong·katanina gipin dilgiparang talataniko on·angaha. Lyngdoh-ni ong·katna am·aniko uamang ma·sisoa gnang aro gipin party-rang baksa agangrikanikoba namen ma·sia ine aganangaha.
MPCC-ni Working President Deborah Marak, Lyngdoh baksa uni block President Richard M. Marwein aro General Secretary Aibor-ni ong·katani chittiko man·soaha aro maming namgija miksongani grian ra·chakaha ine ua talataha. Uni ong·katanichi party-na maming neng·nikaniko ra·bajawa aro ja·pangoni taripilna ba mangrakatpilna kimkime kam ka·anggen ine Marak aganangskaaha. Re·anggipa MP election-ko Marak janape ua somoioba MLA aro MDC-rang donggijaan chena man·aha ine agandapangaha.
Lyngdoh-ni ong·katani bidingo ma·sisogenchimoba maina ta·rake golpogrikna jotton ka·jaha ine sing·on, Delhi-oni party-ni dilgiparang unbaksa agangrikahaoba Lyngdoh uni skaniko dakaha ine Marak talatangaha.
Congress Media In-Charge, Manuel Badwar, NPP dolko tangka aro bilko jakkale MLA-rangko ra·napanina aro democracy-ni niamko pe·enganina matnange aganangaha. Congress dolo dilgiparang komia ong·ja bang·a gitcham MLA-rang aro MDC-rang party-ko bil·akatna re·bapilengaha ine Badwar parakangaha.
