East Garo Hills a·jao Williamnagar songjinmani sepango donggipa Dawa Matchakolgre gittimni rubber bagan damsao mijal pringni somoio mande saksani manggisiko man·aha.
Koborni gitade ia soangenggipa manggisiko rubber grim ning·tuaoniko man·aha aro uko me·asa mande bilsi brekalani ong·gen ine chanchichipani gnang.
Soangenggipa manggisiko porrika ra·nagita Shillong, Directorate of Forensic Sciences ni FSL aro CSU dolrang sokbaaha aro uamang Williamnagar ni Magistrate aro Medical Officer rangni dongtimanio manggisiko porikka ra·aniko dakangaha.
Ia rubber grimo man·gipa manggisiko da·onaba talkuja aro post mortem porikka ra·a jamansa uni siani chongmotgipa a·selko u·ina man·gen ine koborna talatangaha.
