North Garo Hills, Mendipathar Industrial Growth Centre-o donggipa Varun Beverages Limited Plant jean North East a·dok-rangoni dal·batsranggipa bottling plant-ko da·al salo Chief Minister Conrad Sangma nokdonggae on·angaha.
Ia project-ko a·bachengate on·anichi bang·a a·jao songdongenggiparangna kamrangko ka·e cha·na cholrang ong·gnok aro ian a·dokna mingsa pattiani ong·enga. North East a·doko dal·batsranggipa bottling plant-ko Mendipathar-o donggen ine darangba chanchiani dongjachim. Ia Mendipathar Industrial biapko 1990 bilsion ra·manahaoba bilsi 30 batpilonaba mamingnaba jakkalgija galchipe dona nang·ao ga·ake ka·dongsoanirang chu·sokjaha. Ian Purno A Sangma-ni Mendipathar-o Garo Hills-na karkana-rangko dal·roroatna niksamsogipa ong·achim ine Chief Minister Conrad Sangma aganangaha.
Ia Varun Beverages Limited-ko rikna gita tangka gong 340 crore-ko jakkale 37 acre ong·gipa biapo rika cho·aniko ja 11 on matchotatna man·aha. Ian mingsa sorkarini kam ka·enggiparangoni re·baenggipa 2028 bilsio 10 billion-nigita tangka paisarangko man·a ka·dongsoaniko Conrad Sangma aganangaha.
PepsiCo bottling company-an a·gilsak gimiko gnigipa dal·batsranggipa company ong·engani gimin namgipa quality-rangko on·aniko aro minute prakon ge 1,200 bottle-rango bosturangko chipe kam ka·angenga jekai Pepsi, Mountain Dew, Sting, Mirinda orange aro dingtang dingtang bite-oniko tarigipa ringanirangko chipna man·aniko aganangaha.
Ia tarigimin bosturangko Meghalaya a·dokni pilak bakrangona, Assam aro North Bengal-a·dokrangona watatanirangko dakanggen. Mendipathar-o karkana-ko rikna gita a·arangko bilsi 30-na skangan on·ahanina songni Nokma aro Mendipathar-o songdongenggiparangko Chief Minister mittelpilskaaniko on·angaha. Unbaksana ge·gipin karkana-rangko Tikrikilla aro Bajengdoba-o rikenggipaba 90% nigita rika cho·ani kamrang matchotangaha jekon ru·utgija somoirangni gisepon ta·rake a·bachengate on·angna miksonganikoba aganangaha.
Ia nokdonggae on·ani somoio Power Minister Abu Taher Mondal, PHE Department-ni Minister Marcuise N Marak, Deputy Speaker aro Resubelpara-ni MLA Timothy D Shira, MIDC-ni Chairman James P K Sangma, Mendipathar-ni MLA Marthon J Sangma, Bajengdoba-ni MLA Pongseng R Marak, Kharkutta-ni MLA Rupert M Momin aro dingtang dingtang official-rangba dongpae bakko ra·angaha.
