North Garo Hills a·jani ning·o donggipa jean Bodal A·pal antioni Dame A·pal-Raja A·pal anti aro Rangselgre songrangni 10 km ong·gipa ramarangko ta·rake tarie on·china Chief Minister Conrad Sangma-ko mol·molataha.
Ia ramarangan mongsonggipa ong·e salantio bazaar anti-rangchina re·anio manderangna re·rurana aro garirangko salanio ramarang namsrangjani a·selo bang·an neng·nikaniko man·enganina PMGSY scheme-o ta·rake napate on·chinaba janapangaha.
Rangselgre song Resubelpara-oni 7 km-ni gitasan chel·ao donggenchimoba network-rang namsrangjani a·selo neng·nikanirangko man·enganina Rangselgre songo gitalgipa mobile tower-ko songe on·china aganan baksana Rangselgre songo Anganwadi Centre-koba songe on·china aganangaha.Rangselgre songo Community hall dongjani a·selo skul nokkosa songni tom·anirangko ka·chakna nange skul dongani somoirango dingtang dingtang department-rangoni songona re·bagenchimoba tom·aniko ong·atna man·jae neng·nikanirangko man·enga ine aganangaha.
Una agreba Rangselgre songo kal·chakram dongjani a·selo sports-na gisiko nanggipa chadamberangba salantio ranta ka·aniko dakna man·jaenga aro bakra dongjae nangchongmotgipa songni nokni program rangkoba ong·atna man·jaenganina kal·chakramkoba ta·rake tarie on·china Nicholas Nithin Sangma songdonggipa saksa Chief Minister Conrad Sangma-o jinmani palo mol·molangaha.
