East Garo Hills, Songsak jolni Koksi Nengsat songo Fruit Dehydration Unit ko rikna pangchakani ro·ongko da·al salo Chief Minister Conrad Sangma songe on·angaha. Ia project ko Community Public-Private Partnership (CPPP) model ni ning·o rikanggen jekon crore 7.18 tangka paisarangko a·dok sorkarini MBMA department chamatanggen.
Iako dingtang mancha ABRI FPO Multipurpose Cooperative Society Ltd jako ra·e chalaianggen jenikon bilsio 7,400 metric tonne mangni bite rangoniko bostu tarianggen aro 886 metric tonne mangni ran·gipa biterangkoba tarianggen.
Ian ge·a gamani aro bite rangoniko dingtang dingtang cha·anirangko bikotna dakchakange jolo game cha·giparang aro producer group rangna nambate bading chiwalani cholrangko on·anggen.
