Asia-ni gitchambatsranggipa football kal·susaani chong·motan chang 134-gipa Durand Cup 2025-ko Chief Minister Conrad K. Sangma mijal salo Shillong songjinmani Jawaharlal Nehru Stadium-o oprake on·angaha.
Ia program-o Chief Minister Conrad K. Sangma mongsonggipa sokgipa ong·aha. Unbaksa Minister of Sports & Youth Affairs, Shakliar Warjri, Minister of Revenue and Disaster Management Kyrmen Shylla-ba sokbae bakko ra·angaha. Una agreba Chief Secretary D. P. Wahlang IAS, Sports Department ni Commissioner aro Secretary, Dr. Vijay Kumar D IAS aro Eastern Air Command aro 101 Area ni Eastern Command ni senior military official rangba tom·aniona sokbaaha.
Program-o a·doktangoni aro sipai dolrangnigitaba adita dakmesokanirangko nikna man·aha. Indian Armed Force-ni sipairang dingtang dingtang dakgipa changa sapani jekai Kalarippayattu, Para motor show, Motorcycle stunt aro “Badloo Ram Ka Badan” gitko Assam Regimental Centre chroke mesokangaha. Una agreba MGMP-ni adita nambegipa dokgipa dam·giparang Live gitrangko ring·e changa sapaniko dakmesokaha.
Meghalaya a·dok Durand Cup 2025-ko mija bilsi baksa ian gnigipa changna joljol ong·atengaha. Da·al salo Group E ni susaaniko a·bachengataha jekon quarter-final aro semi-final ona kingking Shillong songjinmaon kal·atanggen. Skanggipa susaanio Shillong Lajong FC, Malaysian Armed Forces (ATM FA) baksa susagrikangaha jeon Shillong Lajong 6-0 chi Malaysian Armed Forces ni kosako chegipa ong·aha.
Skotong Minister Conrad K. Sangma, program-o aganengon Durand Cup-ko gnigipa bilsina joljol Shillong-o ong·atna man·anina rasong cha·aniko aro kusi ong·aniko parakaha. Durand Cup-ko ong·atna Shillong-ko baseani giminba Sangma army dolrangko demittelangaha. Shillong ge·sa football ko namnikgipa songjinma ong·ako ua janape grassroot level ba ja·pangoni ia a·bako tang·doatna jotton ka·enga ine aganangaha.
Meghalaya-o 2027 bilsio chang 39-gipa National Games-ko ong·atna skang a·doko sports ni a·bao ta·rakbee dingtanganiko ra·bana sorkari kam ka·enga. Ia dal·begipa kal·susaanio a·song gimikko soka chakna tarisamsona gita a·dokni ge 26 sports association rangna aro Meghalaya State Olympic Association-na rika cho·anirangko nirokna gong ₹ 39.17 crore ko chamataha.
Una agreba CM’s Mission Football 2.0 ni gita sak 10,000 footballer rangko training on·e tarienga, STAR program-nigita sak 24,500 athletes rangko name basee skienga aro bilsi 2028 ni gisepo matchotna gita adoko ge 518 sports facilities rangko tarina aro taridapilna tangka gong ₹1,500 crore ni project rangko pakwataha.
