July 26 tarik 2025: A·dok sorkari Pradhan Mantri Janjatiya Vikas Mission (PMJVM)-ko Meghalaya Basin Management Agency (MBMA) Planning, Investment Promotion & Sustainable Development Department-ni ning·o “Summit for Rural Empowerment” ko Sukrobar salo State Convention Centre, Shillong-o ong·atangaha.
Ia program-ona Chief Minister Conrad Sangma mongsonggipa sokgipa ong·e bakko ra·angaha. Unbaksa Agriculture and Farmers’ Welfare-ni Minister Ampareen Lyngdoh, songni dilgiparang, official-rang aro a·dokoni sak 130 Van Dhan Vikas Kendras (VDVKs) rang dongpae bakko ra·angtokaha.
Songadam nokadamrango bading chiwalaniko tang·doatna PMJVM aro Van Dhan Vikas Kendras Centre-rangko chalaie ge·a gamani, jaktangchi tariani, bara dokani, sol·a repani, sika ko·ani bosturangko tarina gita dakchakenga. Van Dhan Vikas Kendras ge·antian sak 300 songadam nokadamrangni Self-Help Group (SHG) rangko rimnape tangka gong lakh 15 tangkarangko nanggipa bosturangko brena, training aro kam-rangko ka·na dakchakaniko man·soenga. Da·o dipet ge 169 VDVK-rangko a·dokona chamataha. Indake ian hajal-ni hajal songadam nokadamrango songdongenggipa nokdangrangna namgniko on·an baksana ia kendras-nigita dingtang dingtang bosturangko tarianio jekai sal·wa, wa·a, buringoniko man·gipa bija bitchi, haldi, anaros, te·brong, misi aro dingtang dingtang biaptango man·gipa bostu aro biterangko bading chiwalaniko dakanio dakchakaniko on·enga ine aganangaha.
Ia program-o ming 12 Memorandum of Understanding (MoU) rangko nambatsranggipa technical aro research Institute baksa soi ka·angaha. Re·baenggipa salrango ming 7 MoU-rangko ta·raken soi ka·na ka·dongsoanikoba aganangaha.
