West Garo Hills a·jani adita biaprang jekai Tikrikilla, Nidanpur, Chibinang, Bhaitbari aro Phulbari jolrango dingtang mancha gipin a·dok ba a·songoni niamni a·palo napsrukbaaniko champengna infiltration checkpoint ba a·palni mande napbagiparangko dondikate uamangni nanggipa lekka pancharangko niroke kam ka·chakram biapko tarie on·china Western Zone ni A∙chik Dedicated Integrity Leaders (ADIL) dolrang Dadenggre Sub-Divisional Officer (Civil) na seachi mol·molangaha.
Indakgipa biaprangko tarina nanganiara ua jolrang Assam baksa sima ari dongani a·sel ong·a aro batanggimin somoio Assam-o niam gri songdonggipa manderangko Assam sorkarini a·rikgalanichi mikkangchi uamang Meghalaya a·dokni Garo Hills ni bakrangona napsrukbanaba donga ine ken·soaniko ba jajrengsoaniko janapangaha.
Mikkangchi indakgipa checkpoint rangko ra·gatgenchimode a·dokona niamni a·palo napsrukbagipa manderangko champengsona aro tribal manderangni daka rikaniko ripingangna dakchakani ong·gen ine ADIL parakangaha.
