South Garo Hills, Chokpot jolni nangrimgimin NGO-rang Chokpot Degree College-ko ta·rake rika cho·aniko matchotate on·china Education Minister Rakkam A. Sangma-na memorandum-ko on·angaha.
NGO dolrang-ni Education Minister baksa agangrikaniko dakon Chokpot Degree College nokrangko ta·raken matchote aro affiliate ba namrimate on·e a·bachengatna Rakkam Sangma ku·rachakangaha ine NGO dolrang parakataha.
Chokpot Higher Secondary School-ko chalainagipako tik ka·e on·aba Sangma parakangaha. Unikoa, Bandaregre RMSA School-ni math subject-ko skigipani kamko ka·enggipa Hannan Sheikh department-ni gita changgnina kingking show cause notice-rangko man·piloba da·alona kingking skulko ka·na re·bajaengani gimin gipin bimchipgipa skigipako ra·skachina NGO rang didiangjolaha. Uni daitotangko galchipe donanichi poraigipa bi·sarangna gimaani ong·enganikoba uamang u·iataha.
Chokpot jolo songdongenggipa manderangna namgipa ka·dongataniko on·anganina Chokpot-ni nangrimgimin NGO-rang jekai GSU, Chokpot Vigilance Committee (CVC), AHAM, GSMC, FKJGP, AYWO aro A·chik dolrang Education Minister aro Chokpot-ni MLA Sengchim N. Sangma-ko mittelangaha.
