Assam a·dokni Paikan reserved forest-o niamgri songdong a·chagiparangko a·rikgalaniko dakanichi Meghalaya-ona napaaniko champengsona sima ari jolo nirokaniko bilakdapatna Chief Minister Conrad Sangma pilak Deputy Commissioner rang baksa golpogrikaha. Ia tom·anio Chief Secretary, Additional Chief Secretary (Home), DGP aro political department-ni official-rangba bakko ra·angaha.
Golporimani bako Assam-Meghalaya sima ario nirikianiko bilakdapatna aro chu·ongagita chel·chakgipa dolrangko donchina Chief Minister ge·etangaha.
A·dok sorkari ia a·rikgala man·gipa manderang Garo Hills-ona napaaniko champengsonagita district official rang, songni Nokmarang, NGO rang aro Village Defence Party (VDP) rang baksaba agan golpogrikaniko dakenga. Sima ari jolo mongsongbate simsakna nangbatgipa biaprango re·ruraaniko nirokchina aro napsrukna man·janagita bakrime kam ka·aniko dakenga.
Paikan reserved forest-ni 140 mang hectare a·arangko Assam sorkari a·kangpilna aro mongmarang baksa manderang nanggrike chagronganirangko komiatna miksonge dakangaha. A·rikgalaniko dakani somoio police dolrang baksa nanggrike saksa janggitangkoba gimaataha aro bang·aan saknaa man·aha.
Iani bidingo rikgala man·gipa manderangni Meghalaya a·dokona napsrukbaanirangko champengsona tarisamsoanirangko dakangchina Home (Political) Department ni Addl. Chief Secretary Shakil P Ahammed a·dokni pilak Deputy Commissioner rangko mikrake dongna aro uamangni napbaaniko champenge maming so·sojengjeng ong·aoni naljokatna ja·kurangko de·angchina ge·etangaha.
