Meghalaya a·dokona gipinchini re·bae kam ka·giparang Meghalaya Identification, Registration (Safety and Security) of Migrant Workers Act 2020 nigita Labour Department-o lakh-sa mang manderang biming segatangaha.
Department-o biming segataniko 2021 bilsio a·bachengataha jekon uamangna naljokaniko on·a miksonganio dakaha. 2024 bilsio biming segatgipaoniko gong 9.33 cr tangkarangko department man·aha.
2024 bilsioni a·doko chu·gimik sak 93,283 mang bimingrangko segataha. Skanggipa biapo East Khasi Hills jeon sak 41,242 mang segataha, East Jaintia Hills o sak 29,932, EKH aro EJH 10,138, West Khasi Hills 3,820, West Jaintia Hills 3,575, South West Khasi Hills 2,858, West Garo Hills 782, North Garo Hills 372, South Garo Hills 326, East Garo Hills 183 aro South West Garo Hills 55 jean komibatgipaba ong·a.
Act-ni ning·o dongimin niamrangko manigijagiparangna gamna nanganirangko 5,000-oni lakh saona donatchina a·dokni assembly-o batanggimin salrango ra·chakangaha. Iano jarikna nangani raka niamrang gnang aro Crime & Criminal Tracking Network System (CCTNS) ko jakkale name nirokanikoba dakenga.
