North Garo Hills a·jani Rajasimla songoni bilsi 6 ong·gipa me·chik bi·sa re·anggipa July 18 tarikoni nokoni gimaenga aro uko da·onaba man·kujaenga. Ia me·chik bi·sa uni ma·apani kamtangchi re·angani somoio gimana a·bachengaha. Nokona sokbae de·mechikgipako sandiosa uamang uko nikjaha aro bakan noksul songsulna kobor on·aha. Uko songtangoniko jinma melie sandibeoba nikjaha, da·o uni gimaa sal 6 mang gapaha aro sandianiko dakangkuenga.
Gimaenggipa me·chik bi·sani koborko July 18 attamo man·soa bakan police-rang, songni nokni manderang sandianirangko dakgenchimoba da·alona kingkingba mamingkoba ma·sikujaenga aro mai mancha ong·a uko agana man·kujaenga. Nambate am·sandianirangko dakna Tura-oni Search & Rescue Team baksana Dog Squad-rangba sokbaaha ine Additional Superintendent of Police Ravi K Sangma aganangaha.
July 18 tarikoni gimaenggipa me·chik bi·sako man·kujaenganina Mongolbar salo Kharkutta-ni MLA an·tangba police-rang aro songni nokni manderang baksa sandianiko dakdilangaha. Rajasimla songni diltugipa buring bolgrim a·bri chiringrangoniko sandianiko dakangenga. Salantian walo saloba am·sandianiko dontongkujaenga. Garo Hills-ni dingtang dingtang biaprango ia me·chik bi·sako nikgenchimode Police Station-ona koborko u·iatchina Kharkutta-ni MLA Rupert M. Momin aganangaha.
