Batanggimin July 7 tarik 2025-oni Garo Hills Autonomous District Council (GHADC) o kamko ka·enggiparangni dormaharangko man·janina dontonggija jingjengatani a·selo GHADC-ni bang·bata office-ni bakrangko chipna nangao ga·akaha.
GHADC-o dingtang dingtang gadango kamko ka·enggiparangni ja 42 na dormaharangko man·jae neng·nikanirangko chagrongna nange jingjengataniko dakengon council-ni adita branch-rangni office nokrangko da·al salo chipe donaniko nikna man·aha. Dormaharangko man·gija jingjengatanina Executive Member ong·e GHADC-ko chalaidilgiparang council-o kamko ka·enggiparangna bilsisani dormahako on·agita nanga uni ja·manosa jingjengataniko dontonggen ineba koborna u·iatangaha.
GHADC-ni office nokrangko chipe donanio Legislative Department aro Judiciary Department-rangsan kulienga.
Una agreba da·al salni bako Assembly session-ko a·bachengon opposition dolni dilgipa aro Kharkutta Constituency-ni MDC Cherak W. Momin GHADC-o kamko ka·enggiparangna ja 42 ong·pile dormahako on·kujani gimin uamangni jingjengataniko nike session-o gipin agenda-rangko donchenge da·aloni man·a nange dongenggipa dormaharangni bidingo golponagita mol·molaniko dakangaha. Ia janapgimin kattarangko ra·chakgenchim ong·oba da·aloni ong·gija iani bidingo gipin saloni chanchina ine session-ko dilenggipa Deputy Chairman-ni aganani ja·mano opposition-ni MDC-rang ian mongsonggipa ba nangchongmotgipa ong·enga ine ra·chakna jechake ong·katokaha.
