Williamnagar songjinmani Samgong gittimo me·chik chadambe saksako ka·namgija dake so·otanina kal·impaani chingita da·al attampang 6 bajio Tura songjinmani P A. Sangma stadium-o candle light service-ko ong·atangaha.
Ia candle light service-ko National People’s Youth Front (NPYF) Tura ong·ataha. Program-o Meghalaya State Unit Women’s Wing-ni ma·gipa dolrangba bakko ra·angaha. Ia somoio sianggipa Lt. Rikkambe J. Sangma-na sak 200 mangna batpile manderang re·bae kal·impaaniko mesokani chingita sokbatokaha. Program-ni bako minute 2 mangna jrip donge mande ra·anikoba dakangaha.
Mongsonggipa sastroni bakrangko Pastor Bachon G. Momin aganprakangaha. Momin sianggipa chadambeni janggini tom·tomanina aro dongrikenggipa nokdangni manderangna ka·donganiko on·angan baksa Isol-o bichakanikoba dakangaha. Uni skianio ua a·gilsako bang·a sosojengjeng ong·anirangko janape indakgipa ka·namgijagipa kamrangoni chel·e nokgipani skiagita namgipa ramako re·china aro papna kengiparang ong·chinaba ku·pattianiko on·angaha.
Mittelpilani kattarangko NPYF State General Secretary Rangbath D. Sangma aganangaha. Unikoa bon·chotao Meghalaya State Unit Women’s Wing-ni Working President Silme Ch. Marak Isolo bi·enba program-ko matchotaha.
