Chatro chatrirang scholarship ko man·a Aadhaar card ko on·a nangtelja maina gipin ID ba lekka pancharangchin chu·sokatna man·aia ine Meghalaya ni High Court parakataha.
Batanggimin somoio Greneth M. Sangma uni ukil PT Sangma baksa PIL ka·anio, Aadhaar ni bidingo a·dok sorkarini 2023 bilsini October 31 tariko u·iatgimino pangchake Sombar salo Division Bench-o Chief Justice IP Mukerji aro W Diengdoh ni dongpaanio janapangaha jean a·doko dongenggipa manderangko an·tangtangni gimin talate on·a Aadhaar card rangko a·dok sorkari tarina ge·etani hukum donga.
Indake ong·genchimoba maiba kae Aadhaar number ko mesokna man·jagenchimode ba card ko tarina jechakgenchimode, ua mande ge·gipin ID rang jekai pan card, voter ID, passport ba gipin lekka pancharangko mesoke a·dokni dilgiparangna mesokangna nangskagen ine u·iatangaha.
Indakgipa somoio Aadhaar number ba card ko on·a man·jaoba maming neng·nikanirang dongjawa ine High Court parakataha. Ia PIL ni bidingo name dake Supreme Court ni dongimin niamrango pangchake nipiltaianiko dakanggen jekon 2025 bilsini August 12 tariko hearing ko daktaina somoio ko donataha.
