NEHU Tura Campus ni nangchongmotgipa kamrangni bidingo aro dingtang dingtang nanganirangna Garo Students’ Union (GSU), CEC, H. Q. Tura Garoland State Movement Committee (GSMC), CEC, H. Q. Tura, Post Graduate Students’ Union (PGSU), NEHU Tura Campus, NEHU Staffs Tura Campus Welfare Association dolrang NEHU ni Vice-Chancellor Prof. P. Shukla ko Guwahati, NEHU Guest Hiuse-o grongeaha.
Mongsonggipa ong·e grongedilgiparangara GSU ni President Zikku Balgra N. Marak aro GSU ni General Secretary Bibian G. Momin ong·a jean adita nangchongmotgipa kamrangni bidingo talate VC baksa agangrikangha. Unbaksana PGSU, NEHU Tura Campus ni Additional General Secretary Joylish D. Sangma, Garoland State Movement Committee (GSMC) ni Acting Chairman Balkarin Ch. Marak, Asst Organizing Secretary Nikcheng Marak, Asst. Environment Secretary Silbirth A. Sangma, Executive Member Litos Marak mangba re·angpae grongangtokaha.
Uamangni gronge tom·anio dingtang dingtang nanganirangko chu·sokatna an·tangni chanchianiko VC P. Shukla jinmana parakataha. Mongsonggipa grongani miksonganirangara ru·uta bilsirangoni dabiengipa Asst. Regristrar, Deputy Registrar ko seoke on·china aro Finance ba tangka paisanigita chu·ongagita chamate on·china ong·a ine parakataha.
Adita golpoanirangko dake VC dingtang mancha uni bilnigita Tura Campus-na jeko on·a man·agita dakchakna jotton ka·anggen ine aganangaha.
