Bangladesh a·songoni niamni a·palo napsrukbagipa manderangko maikai mikkangchi rakbate champengna man·ani ramarangko namdapatna Meghalaya Resident Safety and Security Act (MRSSA) ko bilakdapatna ba gitalgipa niamko ra·gatna a·dok sorkarini miksonganiko Deputy Chief Minister Prestone Tynsong parakangaha.
Kobor ra·timgiparang baksa agangrikengon, sima ari joloni napsrukbagiparangko champengna a·songni dongimin niamrango pangchake rakgipa niamrangko tarina nanganiko Tynsong janapangaha. Bangladesh baksa Meghalaya a·dok 443 km mangni palo sima ari gnang aro ia biaprangko nirokna ma·mong sorkarini tarigimin niam jean Infiltration and Deportation Act nigita BSF dolrang nirokaniko dakangenga.
Indakgipa niamo pangchake ma·mong sorkari sima ari jolrangko nirokanikaniko dakengon, niamni a·palo napbagipa manderangko champengna a·dok sorkarinigitaba dingtang mancha rakgipa niamrangko nangdapenga ine Home Minister Prestone Tynsong aganangaha. Mikkangchi ma·mongni dongimin niam mangmango pangchakna nanggija name dake MRSSA ko nipiltaie bilakdapatna ba gitalgipa niamko taritaina nanganiko sorkari name dake chanchirime ja·ku de·anggen ine Tynsong aganangaha.
Meghalaya ona manderangni niamgri napsrukbaaniara gitalgipa ong·ja maina Bangladesh a·songoni mangmangsan ong·aigja gipin a·dokrang jekai Assam, West Bengal rangoniba manderangni napbaaniko chagrongenga ineba ua parakangaha.
