Battanggimin chango Assam Goalpara a·jani Paikan reserved forest-o niam gri songdonggipa manderangko a·rikgalani ja·mano Garo Hills-ona napaskaana kenchaksoe West Garo Hills-ni District Youth Congress Committee, Superintendent of Police aro Additional Deputy Commissioner-ko Tura-o gronge memorandum-ko on·angaha.
Ia rikgala man·gipa manderang Assam aro Meghalaya sima ari jolo niam gri dake songdongskanaba donga mongsongbate West Garo Hills a·jao dongchaknaba gnang ine committee parakaha. Ia memorandum-o uamang district administration-ko champengsoani ja·kurangko dakchina, sima ari jolo nirokaniko mangrakatna, songni manderang baksa ku·mongna aro daitoko ra·e saksa sakgipin baksa pangchakgrike kam ka·china didiataha.
Assam sorkari 140 hectare mang Paikan reserved forest-ni a·arangko a·kangpilna aro mande baksa mongmarangni nanggrikani batroroenganiko komiatna jotton ka·e niam gri rike dongenggipa bang·a nokrangko pe·aha. Ia biapo dongchakgipa nokrangko re·anggipa antini Sonibar salo pe·aha. Indake ong·genchimoba ia biapo mitamrang noktop rike dongkuaha aro ia nokrangko bon·e a·rikgalna dakengon manderang rong·terangko goan baksa go·olrangko ra·e police dolrangko chadrapaha. Ia obostao saksa mande janggitangko gimaataha, manderang aro police doloniba aditaan saknaa man·aha.
