South West Garo Hills ni Meghalaya Bharat Scouts & Guides ni ong·atanggipa Summer Camp da·al salo namen matchotangaha. Ia camp ko Ampati Govt Higher Secondary School-o salbrina chong·motan July 14 oni 17 tarikona ong·atangaha.
Ia camp ko ong·atani miksonganiara Scouts and Guides-o napgipa dambe chadamberangna uamangni summer vacation ba chutti man·ani somoio kal·susaani, git ring·ani aro chrok mesagrikani cholrangchi saksa sakgipin baksa apsan melie nanggrime dongna man·agita dakangaha. Unbaksana uamang maikai mikkangchi songsalna apsan bakrime ku·cholsan ong·e daitorangko an·tangtango done kam ka·na tarisamsoaniba ong·a.
Ia camp-o sak 103 chadamberang baksa sak 65 Guide rang ba dilgiparang, sak 23 Scout rang, sak 5 Rover, sak 4 Ranger rang aro sak 6 ka·rimskarangba bakko ra·angtokaha.
Ia camp-ni skanggipa salo Ampati Govt. HS School ni Principal Chingky G Momin chatro chatrirangna gisiknigita didiataniko on·e ia camp ko a·bachengataha. Gnigipa salo Sub-Divisional School Education Officer, Ampati, T Ch Marak aro Sub-Divisional Medical & Health Officer, Ampati, Dr. Lydia M Marak mongsonggipa ong·e sokbae bakko ra·angtokaha.
Ampati MBS&G ni District Secretary Pular D Shira aro District Organizing Commissioner (S), Debarson A Sangma ni dilanio ia camp ko chu·soke on·angaha.
