July 17 tarik, Bristibar Sal: Tura Don Bosco College-o Meghalaya Basketball Association (MBA) dingtang mancha Tura District Basketball Association (TDBA) aro Williamnagar District Basketball Association (WDBA) baksa Shillong Labet ni dakchakaniko man·e Meghalaya State Sub-Junior Basketball Championship jekon July 16, Budbar salo a·bachengate da·al salo bon·kame susagrikanirang namen matchotangaha. Ia tournament ni final kal·susaaniona West Garo Hills a·jani District Sports Officer Saljagring M. Marak mongsonggipa sokgipa ong·e bakko ra·angaha.
Ia Sub-Junior kal·susaaniko 2012 bilsini January jani 1 tarik ja·mano atchigipa bi·sarangna chong·motan U-13 ni Me·a aro Me·chik bi·sarangna knockout basis-o salgnina ong·atangaha.
Me·asarangoni final kal·susaanio Shillong oni Dubakh A aro Don Bosco Higher Secondary School Tura kal·susagrikangaha jeon Dubakh A 68-33 pointrangko man·e Don Bosco Higher Secondary School Tura ni kosako chegipa ong·ange gnigipa gadangko Don Bosco Higher Secondary School Tura man·angskaaha. Apsan daken me·chikrangni bako Shillong oni St. Mary’s Higher Secondary School aro Dubakh final ko kal·susagrikangaha jeon St. Mary’s School Shillong 29-19 points ko man·e me·chikrangni gisepo chegipa ong·angaha aro Dubakh dolrang gnigipa gadangko man·angskaaha.
Ia kal·susaani gisepo me·asa dolrangoni an·tangni changa sapanio nambatgipa bimungko Dubakh doloni Shawn Gabriel Rynjah, Most Valuable Player ni boksis ko man·angaha. Apsan daken me·chik dolrangni gisepo St. Mary’s Higher Secondary School Shillong ni Rimesha Kharbyngar, Most Valuable Player ni boksis ko man·angskaaha. Kal·susaanio chegipa aro gnigipa gadangko man·gipa dolrangna Certificate aro Trophy rangko on·aniko dakangaha.
Ia Meghalaya State Sub-Junior Basketball Championship kal·susaanio me·asarangni gisepo dol 6 bakko ra·angtokaha, chong·motan Shillongoni Dubakh A, Dubakh B, Turaoni Lycans, Don Bosco Basketball Academy, Darenggre Basketball Club aro Don Bosco Higher Secondary School Tura. Me·chikrangoni dol 4 bakko ra·angaha jean Shillongoni Dubakh, St. Mary’s Higher Secondary School Shillong, Turaoni Don Bosco Academy Tura aro Kawate dolrang ong·a. Ia tournament-o Basketball kal·na gisiko nanggipa chadamberang bakko ra·anian a·doko dingtang mancha ia kal·susaani a·bani tang·dobaanikoba nikna man·angaha jean mikkangchi nambata gadangona sokdoatna tarisamsoaniba ong·enga.
