Meghalaya Basketball Association (MBA) ni District Basketball Association (DBA) Tura aro Williamnagar District Basketball Association (WDBA) nangrime Meghalaya State Sub-Junior Basketball Championship ko Don Bosco College Tura-o a·bachengataha. Ia susaaniko Meghalaya Basketball Association (MBA) ni President Joel Marbaniang aro General Secretary Wanlambok Lawphniaw, Tura aro Williamnagar ni District Basketball Association-ni dilgiparang baksa oprake on·angaha.
Sub-Junior dolrangni kal·susaaniko 2012 bilsini January jani 1 tarik ja·man atchigiparangna chongmotan U-13 ni me·a aro me·chik bi·sarangna knockout basis-o salgnina ong·atanggen.
Ia susaanio me·asarangni gisepo dol ge 6 mang bakko ra·aha chong·motan Shillong-oni Dubakh A, Dubakh B, Tura-oni Lycans, Don Bosco Basketball Academy, Darenggre Basketball Club aro Don Bosco Higher Secondary School Tura ong·a. Me·chikrangoni dol 4 mang bakko ra·aha jean Shillong-oni Dubakh, St. Mary’s Higher Secondary School Shillong, Tura-oni Don Bosco Academy Tura aro Kawate ong·a.
Da·al skanggipa salo bakko ra·gipa dolrangni gisepo bilsugrike susagrikaniko nikna man·aha. Me·asarangoni Shillong-oni Dubakh A aro Don Bosco Higher Secondary School Tura final-ona doangaha. Me·chikrangni gisepo Shillong St. Mary’s Higher Secondary School aro Dubakh dol final-ona doangskaaha. Meghalaya State Sub-Junior Basketball Championship 2025 ni final-rangko knalo Don Bosco College Tura ni basketball kal·chakramo salni 1 bajio kal·anggen.
