Meghalaya Board of School Education (MBOSE), Tura-ni Executive Chairman-ni kamna Rikse Marak-ko donataniko ra·galchina Adv Bernita Marak dabiange Chief Minister Conrad Sangma-na chittiko sedoataha.
Batanggimin salrangoba Rikse Marak-ko Garo Hills Autonomous District Council (GHADC) o bang·a tangka paisarangko jakkalsrete bang·a kamrangko chu·sokgija ka·anirangna kamoniko ra·galangaha. Unbaksana Babupara-o World War l-ni Cenotaph rikgipako jinmarangna u·iatgija pe·e galanio jak dongpaa ine janapange, da·o uko indakgipa chugipa gadangni kamna rakkianian mikkangchi neng·nikanirangko ra·baani ong·gen ine Bernita Marak aganangaha.
MBOSE-ni Executive Chairman-ni kamna dongimin niamrango pangchake gitcham dilgiparangko seokagita seokna nanga jean Commissioner aro Secretary-ni gadangna komigijagipakosa rakkina nanga ine Bernita Marak aganangaha. Uni gimin jinmarangni palo aro chatro chatrirangni mikkangchi poraianio neng·nikanirangko sokatjana gita ia ong·gijagipa kamrangko ta·rakkale nirokate Marak-ko kamoniko ra·galchina A·chik State Peoples’ Front-ni General Secretary, Bernita Marak dingtang mancha Chief Minister Conrad Sangma-ko mol·molangaha.
