Chang 107 gipa Garo Labour Corps Day-ko, A∙chik pagitcham sakantiko gisik ra∙an baksa mande ra∙ani chinko mesoknagita 1919 bilsionin July 16 tariko A·chik a·songo bilsiantian manirongbaenga. Apsan daken da∙alo ia maniako Tura-o Lower Babupara donggipa Cenotaph-o Tura Municipal Board dakdilangaha.
Ia manianiona Williamnagar Assembly constituency ni MLA aro Public Health Engineering Department, Soil & Water conservation-ni Minister Marcuise N. Marak, Deputy Commissioner, West Garo Hills, Vibhor Aggarwal IAS, Superintendent of Police, West Garo Hills, Abraham T. Sangma IPS, Chairman, Tura Municipal Board, J D Sangma, GHADC-ni CEM Albinush R. Marak, Principal Don Bosco College Tura, Fr. Januarius Sangma, ABDK Tura-ni President B. B. Sangma, Mothers’ Union-ni dilgiparang, dingtang dingtang Pressure Group rangni dilgiparang, skulni chatro chatrirang, gipin official-rang, Senior Citizen aro Tura Municipal Board-o kam ka∙giparang sokbatoke bakko ra∙angtokaha.
Da·alni program-ona Minister Marcuise N. Marak mongsonggipa ong∙e sokbae ia 107 gipa Garo Labour Corps Day-ni gamchataniko aro pagitchamrangni France a∙songo skanggipa World War-o dangdike on∙angani bidingo aganangaha.
Tom·bimongani bako HTC ni Senior Librarian, Seming D. Sangma ni chapa ka·gipa ki·tap A·chikrangni France a·songona re·angani gimin segipa ‘The Garo Labour Corps-World War I’ koba oprake on·angaha.
Ia salko dingtang mancha uamangni dakgrikchakram a∙bao ka∙dongbee dangdike on∙ani aro tom∙tome a∙jatangona sokbaaniko gisik ra∙aniko dakan baksana 107th Garo Labour Corps ni France a∙songo skanggipa World War-o sianggipa janggirangko gisik ra∙agita manibaenga.
Ia Garo Labour Corps Day-o an∙chingni pagitchamrangni dangdike on∙aniko mande ra∙bee gisik ra∙na Babupara Cenotaph-o sianggipa janggirangna bi∙chakaniko dakange pul bibal rangko donangaha. District Police aro 2nd MLP Battalion, Goeragre-nigita mande ra∙ani chinko dingtang mancha mesokanikoba dakangan baksana sianggipa janggirangko gisik ra∙na minute gnina tom∙tome jrip donganikoba dakangaha. Ia sal sakanti A·chik skarangna namen gamchatgipa aro gisik ra·na kragipa ong·a.
