July 15 tarik, Mongolbar Sal: Tura Don Bosco College o Garo Hills ni Basketball Referee rangna sal 2 na ong·atanggipa Referees Clinic da·al salo namen matchotangaha. Ia clinic ko Meghalaya Basketball Association (MBA), Tura District Basketball Association (TDBA) aro Williamnagar District Basketball Association (WDBA) apsan nangrime ong·atangaha.
Ia Referees Clinic ko Meghalaya ni gipin biaprangosan ong·aigija, dingtang mancha Garo Hills oba basketball kal·susaani a·bao nirokna changgipa aro kakket bichalko on·a man·gipa referee rangni gadangrangko tang·doatan baksana referee rangko bariatna aro namdapatna miksonge ong·atangaha. Ia Clinic ko a·doko basketball ni niamrangko ja·rikna sapgipa ba u·igiparang jemangan State aro National Referee ong·giparang Garo Hills ni dingtang dingtang a·jarangoni sak 10 bakko ra·anggipa gital referee rangna salgnina ong·atangaha.
Basketball ni bidingo nambate u·ina sikgiparangna kal·susaani gitalgipa niamrang, referee ni bil, dakna nanggipa ba nanggijagipa aro plak ja·rikna nanggipa daitorangni bidingo bak ra·giparangna agan skie on·angaha. Clinic ko bak gni dake somoiko sualangaha jeon bakko ra·enggiparangna Theory aro Practical session rangko ong·ate namgipa skiani cholrangko on·angaha.
Tura Don Bosco College o me·a aro me·chik dolrangna knaloni a·bachengate sal 4 na ong·atnasienggipa Meghalaya State Sub-Junior Basketball Championship na tarisamsoagita ia clinic ko ong·atangaha.
