South Garo Hills, Chokpot Civil Sub-Division-ni ning·o donggipa Warimagre Agricultural Farmer Training Centre-o scientific mining-ko ra·gate koela bikotaniko champengna public hearing-ko ong·atangaha.
Ia jinma tom·e chanchianiko dakanio koela bikotaniko nangnikjae bang·an jegalaniko dakangaha aro mittam manderangni koela bikotaniko nangnike dabiani a·selo adita nanggrike tom·aniko matchotgijaan dontongatna nangaha ine NGO dolrang parakataha.
Koela bikotaniko dakgenchimode Chokpot jolo donggipa mingsinggipa biaprang jekai Wari chora, Redingsni wari, Tengki Rongret wari, Jamdam wari aro Rompa bisik-rang nosto ong·atako man·gen ine NGO-rang aganangaha.
Iarang pilakon niksamsoe Chokpot jolo songdongenggipa manderang koela bikotaniko champenganiko dakenga. Uni kosako manigija drae koelarangko bikotna cho·e sandianiko dakgenchim ong·ode rakbatgipa ja·ku-ko de·anggen ine Chokpot jolni nangrimgimin NGO dolrang aganangaha.
