Bangladesh-oni India a·songona niam gri napsrukbagipa sak 26 mang aro uamangna dakchakgipa India-ni sak 4 manderangko 22 Bn BSF dolrang sima ari jolniko rim·aha.
Abri jol Matchokpara-o gari bolgittam mang Purakhasia jolo Barengapara chipak SH-13 ramako re·angako BSF dolrang niksoe rangsan uamangko changaha. Sing·sandianiko dakon iamang sak 26 manderangko India-ni sak 4 manderang napsrukbana dakchakaha ine u·ina man·aha. Ia kamo jak donggipa pilakon nirikigipa BSF dolrang rim·aha aro nanggipa sing·sandianirangko dakangkuenga.
Ian BSF dolrangni kakketgipa koborrangko bimchipe am·rikitanichi aro nirokanichi chu·sokna man·aha. Sima ari jolo bang·a changon Bangladesh a·songoni napsrukbana jotton ka·aniko nikna man·enga. Iasan ong·aigija India a·songoni dingtang dingtang bosturangko niamni gri dake badingsrukna jotton ka·giparangkoba jringnan nikenga. Indake ong·genchimoba BSF dolrang Indo-Bangla sima ari jolo raken nirikianiko dake bang·bata changon ia obostarangko chagronge niam gri kamrangko champengsoenga.
