Chokpot jolni NGO rang jekai Garo Students’ Union (GSU), Federation of Khasi Jaintia and Garo People (FKJGP), Garoland State Movement Committee (GSMC), A·chik Holistic Awakening Movement (AHAM), Chokpot Area Vigilant Committee (CAVC), A·chik Youth Welfare Organization (AYWO) aro ACHIK dolrang Raja Ronggat ni Nokma Council baksa apsan nangrime re·anggipa July 12 tarik, 2025-o tom·aniko dakangaha. Ia tom·aniko South Garo Hills ni Chokpot subdivision ni Raja Ronggat songo donggipa Nokpante-o ong·atangaha.
Ia tom·anio Chokpot jolni dingtang dingtang songrangni sak 60 Nokma rang sokbae bakko ra·angtokaha jeon uamang jolni nangchongmotgipa kamrangni bidingo chanchirimangaha. Adita chanchirimanirangko dake uamang samtangtangko jekai chibima aro chiring rangko ripingna tik ka·ange niamgri bol de·aninrangko, an·cheng bikotaniko aro gipin nisiatgipa kamrangko champengna daitoko ra·na chanchirimangaha.
Pora skiani a·bako namdapatna aro chatro chatrirang gipin biaprangchi re·na nanggija joltangon nambata gadangni bidako skie ra·na cholko man·a Chokpot Degree College ko Captain Williamson Sangma State University ni ning·o ra·gate on·china ta·rakkale kamrangko ka·angchina ja·ku de·na ra·chakangaha.
Bang·a songrangona gipin jatrangni napbaenganiko name dake am·sandigijani a·sel uamangni songdonganirang batrikrikenganiko chagrongani gimin jatni dakbewal aro a·ani nokgipa ong·aniko ripinge rakkina dingtang mancha iarangko nirok simsakna songni dilgiparang aro Nokma rangko didiangaha.
Chokpot antio skatang jabol galanirangko champengna aro rongtal an·talanirangko rakkina dingtang mancha jabol galchakram biapkoba sandichina songni dilgiparang tik ka·angaha.
Chokpot jolo nitobegipa biaprang dongani gisepon tourist rangna rochakram biaprangko namdapatna aro song nokni manderangna janggi tangani cholrangko tang·doatnaba chanchirimangaha. Iasan ong·aigija, Chokpot jolo rama jal·angrang bilongen namjani a·selo bang·a neng·nikanirangko chagronganichi jako ra·e kam ka·enggiparangko ramarangko taridape on·chinaba mol·molangaha jean re·a doani, gari gora re·anio, bading chiwalanio, pora skianio aro sanna bannanirangko altubate man·a cholko on·anggen ine uamang janapangaha.
